Likovë, 2 gusht – Nexhmedin Sadiku do të garojë për postin e kryetarit të Komunës së Likovës si kandidat i Koalicionit VLEN, duke e konsideruar këtë një thirrje për shërbim ndaj qytetarëve të kësaj komune me histori krenare dhe qëndresë të palëkundur.
Në njoftimin publik për kandidaturën e tij, Sadiku u shpreh se është thellësisht i përkushtuar për t’i dhënë Likovës drejtimin që Meriton, drejtim që sjell zhvillim, investime të drejta dhe përfaqësim të dinjitetshëm.
“Koha është tani që krenaria dhe potenciali i Likovës të shndërrohen në veprime konkrete që ndikojnë pozitivisht në jetën e përditshme të secilit prej nesh”, tha Sadiku.
Ai paralajmëroi një fushatë ndryshe nga e zakonshmja pa gjuhë urrejtjeje, pa ndasi politike, por me ide të qarta dhe projekte të realizueshme që burojnë nga nevojat reale të banorëve të Likovës.
“Fushata jonë do të jetë e bazuar në respekt, vizion dhe ndërtim, jo në fyerje e ndasi. Do të prezantojmë një program me zemër, për të ndërtuar një komunë ku të rinjtë kanë perspektivë, të moshuarit kanë dinjitet dhe të gjithë kanë vend”, theksoi ai. (INA)