Shkup, 9 shkurt – Progresi i Maqedonisë së Veriut në procesin e integrimit evropian dhe prioritetet që lidhen me Agjendën e reformave dhe procesin e anëtarësimit, ishin në fokus të takimit mes ministrit për Çështje Evropiane dhe zëvendëskryeministrit të Parë, Bekim Sali me ambasadorin e Italisë në vend, Paolo Palminteri.
Siç kumtoi MÇE, ministri Sali theksoi përkushtimin e Qeverisë për ofrimin e rezultateve konkrete, me fokus të veçantë në sundimin e ligjit, forcimin e kapaciteteve institucionale dhe përmirësimin e shfrytëzimit të fondeve evropiane.
Bashkëbiseduesit shkëmbyen mendime për mundësitë e bashkëpunimit përmes instrumenteve evropiane, veçanërisht në kuadër të programeve TWINNING dhe TAIEX, si dhe përmes programeve rajonale dhe transnacionale në të cilat merr pjesë Maqedonia e Veriut.
“Ministri Sali shprehu mirënjohje për mbështetjen e Italisë në fusha kyçe si mjedisi, energjia, politika sociale dhe zhvillimi ekonomik, si dhe për solidaritetin dhe ndihmën gjatë përballjes me përmbytjet në vitin 2016 dhe krizën e migracionit”, thuhet në kumtesë.
Prej aty shtojnë se Sali po ashgtu ka theksuar se Ministria për Çështje Evropiane mbetet e përkushtuar për thellimin e bashkëpunimit me Italinë, veçanërisht në fushat që lidhen me reformat dhe integrimin evropian të vendit.