Zëvendëskryeministri italian, Matteo Salvini, akuzoi Gjermaninë dhe Francën se po kundërshtojnë një marrëveshje paqeje për Ukrainën.
“Duket sikur disa njerëz në Paris dhe Berlin kanë probleme të brendshme dhe duan të vazhdojnë luftën, ndoshta për të shitur armë”, tha sot politikani i djathtë për gazetën ”La Repubblica”.
Salvini nuk dha detaje për akuzat e tij, por kritikoi përpjekjet evropiane për të përmirësuar planin e paqes me 28 pika të presidentit amerikan Donald Trump, i cili shihej gjerësisht si tepër i favorshëm për Rusinë.
”Plani i Trump është shumë i rëndësishëm dhe ambicioz, edhe pse disa e tallin”, tha Salvini, i cili shërben edhe si ministër i Infrastrukturës.
”Shpresoj që askush të mos ndërhyjë”, theksoi ai.
Salvini është lider i partisë populiste të djathtë, ”Lega”, një nga dy partnerët e vegjël në koalicionin e djathtë të kryeministres italiane, Giorgia Meloni.
Në rolin e tij të mëparshëm si ministër i Brendshëm, Salvini u bë i njohur për qëndrimin shumë të ashpër ndaj refugjatëve në Mesdhe.
Meloni, që udhëheq partinë ”Vëllezërit e Italisë”, ka dëshmuar se është një mbështetëse e qëndrueshme e politikës evropiane për Ukrainën.