Shkup, 5 tetor – Dje dhe sot, përfaqësuesit e më shumë se 100 shteteve dhe qeverive po marrin pjesë në Samitin e 19-të të Frankofonisë në Villers-Cotterêts, raporton Portalb.mk.
Presidenti francez Emanuel Macron ka thënë se Frankofonia është një “zonë ndikimi” dhe u bëri thirrje anëtarëve të saj të “punojnë së bashku për të zhvilluar një diplomaci” që mbron “sovranitetin dhe integritetin territorial” kudo, “pa standarde të dyfishta” – nga Ukraina deri në Liban.
“Frankofonia është një zonë e ndikimit diplomatik që na lejon të përballemi me sfidat e shekullit…Ky është një vend ku së bashku mund të zhvillojmë diplomaci që mbron sovranitetin dhe integritetin territorial në mbarë botën”, tha Macron.
Tetëdhjetë e tetë vende dhe qeveri janë anëtarë të Organizatës Ndërkombëtare të Frankofonisë (OIF). Për herë të parë në 33 vjet po mbahet samit në Francë.
Në Samit sot merr pjesë edhe ministri i Punëve të Jashtme dhe Tregtisë së Jashtme, Timço Mucunksi.
Ndryshe, për të festuar këtë vit të gjuhës frënge si dhe Ditën Ndërkombëtare të Frankofonisë, Ministria Franceze për Evropën dhe Punët e Jashtme ka nisur Festivalin e Frankofonisë, “”Krijimi i një bote më të mirë”” dhe konkursin #SingInFrench në rrjetet sociale.
Festivali i Frankofonisë “Krijimi i një bote më të mirë” është një ftesë për të eksploruar dimensionet artistike, kulturore dhe sipërmarrëse të krijimtarisë frankofone.