Viti 2025 shënoi një nga periudhat më të rëndësishme të futbollit shqiptar në dekadën e fundit, me Kombëtaren Shqiptare që mbajti gjallë ëndrrën e kualifikimit për Kupën e Botës 2026.
Nën drejtimin e trajnerit Sylvinho, Shqipëria zhvilloi një fushatë solide në kualifikimet europiane, duke treguar stabilitet, disiplinë taktike dhe rritje të vazhdueshme në lojë.
Kuqezinjtë arritën të jenë konkurrues në grupin e tyre, duke marrë rezultate vendimtare ndaj kundërshtarëve direkt dhe duke mbetur në garë deri në fund për një vend që çon drejt fazës finale të Botërorit. Edhe pse objektivi i kualifikimit direkt rezultoi i vështirë, Shqipëria siguroi të drejtën për të luajtur në “play-off”, duke e mbajtur të hapur shansin historik.
Kuqezinjtë u renditën në vendin e dytë pas Anglisë, ndërsa momenti më i rëndësishëm ishte padyshim fitorja ndaj Serbisë në Leskovc 0:1 me golin e Arb Manajt, i cili festoi me shqiponjë.
Viti 2025 u karakterizua edhe nga konsolidimi i një bërthame të fortë lojtarësh, me disa futbollistë që spikatën në kampionatet europiane dhe u shndërruan në shtylla të skuadrës kombëtare. Balanca mes përvojës dhe elementëve të rinj i dha ekipit identitet dhe besim për ndeshjet vendimtare.
Tashmë, gjithë vëmendja është përqendruar te play-off-i i marsit 2026, ku Shqipëria do të kërkojë të shfrytëzojë momentumin dhe përvojën e fituar gjatë vitit 2025 për të bërë hapin e madh drejt Botërorit.
Fillimisht, Shqipëria do të ndeshet me Poloninë në udhëtim. Në rast se triumfon, atëherë do të ketë punë me fituesin e ndeshjes mes Suedisë dhe Ukrainës.