Një sërë studimesh shkencore po sjellin një lajm të mirë për një grup të caktuar njerëzish: ata që janë më të shkurtër kanë avantazh shëndetësor dhe jetojnë më gjatë se personat e gjatë.
Edhe pse prej dekadash është promovuar ideja se gjatësia lidhet me shëndetin dhe jetëgjatësinë, analiza të reja tregojnë një panoramë tjetër.
Studime të mëdha, si NHANES I dhe kërkime në universitetin e Glasgout, kanë zbuluar se gjatësia e shkurtër nuk lidhet domosdoshmërisht me rrezik më të lartë sëmundjesh. Madje, në shumë raste, personat më të shkurtër shfaqin përparësi në jetëgjatësi.
Shembuj të qartë vijnë nga shoqëritë tradicionale: banorët e Okinavës në Japoni, të njohur si popullata më jetëgjatë në botë, janë dukshëm më të shkurtër dhe më të lehtë se evropianët e veriut dhe amerikanët. Dieta e tyre e shëndetshme, e kombinuar me aktivitetin fizik dhe mënyrën e jetesës, bën që të kenë normat më të ulëta të kancerit dhe sëmundjeve të zemrës.
Studime të ngjashme në Afrikën e Jugut, Ishujt Solomon dhe Kitava tregojnë se komunitetet me gjatësi mesatare më të ulët kanë shëndet më të mirë dhe pothuajse mungesë të sëmundjeve kronike që prekin botën moderne.
Sipas ekspertëve, burrat e shkurtër jetojnë mesatarisht tre vjet më shumë se burrat e gjatë. Ky përfundim hedh poshtë mitin “më e madhe është më e mirë” dhe sjell një lajm inkurajues për miliona njerëz në mbarë botën.
Pra, duket se gjatësia e shkurtër nuk është aspak pengesë, përkundrazi: është një avantazh për jetë më të gjatë e më të shëndetshme.