Shkup, 3 korrik – Ministri i Punëve të Jashtme, Timco Mucunski, ka zhvilluar sot takim me ambasadoren e Rumanisë, Adela Monika Aksinte, në të cilin, siç bën me dije MPJA-ja, janë konfirmuar marrëdhëniet tradicionale dhe miqësore mes dy vendeve “të cilat edhe në të ardhmen do të përmirësohen dhe thellohen, me fokus të veçantë në bashkëpunimin ekonomik”.
“Njëherit, u theksua edhe dinamika e bashkëpunimit dypalësh, duke filluar nga dialogu politik, bashkëpunimi sektorial dhe bashkëpunimi ynë i ngushtë në nismat rajonale. Tema e bisedimeve ishte integrimi i vendeve të Ballkanit Perëndimor në BE, ku bashkëbiseduesit ranë dakord se zgjerimi i mëtejshëm i Bashkimit Evropian nuk është vetëm një nxitje për vendet e rajonit, por edhe një interes thelbësor për vendet anëtare”, kumtoi Ministria.
Mucunski shprehu falënderim “për mbështetjen e vazhdueshme dhe të parezervë nga Rumania për anëtarësimin tonë në Bashkimin Evropian, si dhe për gatishmërinë e tyre për të ofruar ndihmë në fusha specifike që janë me interesin tonë”.
“Bashkëbiseduesit iu referuan edhe aleancës brenda NATO-s dhe nevojës për forcimin e bashkëpunimit në kuadër të sfidave të sigurisë me të cilat po përballemi”, theksohet në kumtesën.