Shkup, 25 shtator – Në ditën e dytë të Asamblesë së Përgjithshme të 79-të të Kombeve të Bashkuara, ministri i Punëve të Jashtme dhe Tregtisë së Jashtme, Timço Mucunski, zhvilloi dy takime të ndara me shefin e diplomacisë së Estonisë, Margus Cahkna dhe me ministrin e Bashkëpunimit Ndërkombëtar të Emirateve të Bashkuara Arabe, Reem Al Hashimu.
Siç kumton MPJ, në takimin me ministren Cahkna, u konfirmuan marrëdhëniet e shkëlqyera dypalëshe dhe vullneti i të dyja palëve për thellimin e bashkëpunimit.
“U potencua edhe interesi i përbashkët për intensifikimin e marrëdhënieve të ndërsjella, me theks të veçantë në fushën e ekonomisë, tregtisë, digjitalizimit dhe teknologjive bashkëkohore. Ndërkohë, u theksua partneriteti dhe bashkëpunimi në kuadër të Aleancës së NATO-s, si dhe në procesin e anëtarësimit tonë në Bashkimin Evropian”, theksohet në kumtesë.
Në kuadër të takimit me ministrin e Emirateve të Bashkuara Arabe, Al Hashimu, megjithatë, u konfirmua zhvillimi i marrëdhënieve miqësore mes dy vendeve, ndërsa u mirëpritën marrëdhëniet ekonomike dhe bashkëpunimi në planin shumëpalësh.
“Bashkëbiseduesit diskutuan edhe për mundësitë e përmirësimit të kornizës së dakorduar, si dhe bashkëpunimin në fushën e kulturës dhe arsimit. Njëkohësisht, u shkëmbyen mendime edhe për prioritetet e politikës së jashtme të dy vendeve, si dhe për çështjet aktuale ndërkombëtare dhe tema rajonale”, theksojnë nga MPJ-ja.