Kreu i Partisë Demokratike, Sali Berisha ditën e hënë pritet të paraqitet në SPAK pasi Apeli i GJKKO-së caktoi masën e sigurisë “detyrim paraqitje” ndaj tij. Berisha do të paraqitet në SPAK dy herë në muaj, të hënën e parë dhe të tretë të çdo muaji.
Paraqitja e parë e Berishës për muajin janar do të shoqërohet me protestë. Në njoftimin e shpërndarë PD shruhet se më 6 janar në orën 09:30 do të mobilizohen strukturat e degëve të Partisë Demokratike për të protestuar para SPAK-ut, që cilësohet si një vegël në duar të Edi Ramës për të persekutuar kundërshtarët politikë.
Njoftimi:
Ditën e hënë në orën 9:30, mobilizojmë të gjitha strukturat e degëve të Partisë Demokratike për të protestuar para SPAK-ut, si një vegël në duar të Edi Ramës për të persekutuar kundërshtarët politikë. Ne do të jemi aty për të mbështetur të drejtën, ligjin dhe të vërtetën, që janë në anën e Kryetarit të Partisë Demokratike, Prof. Dr. Sali Berisha.
Protesta do të nisë në orën 9:30 përpara selisë së SPAK-ut. Ju ftojmë të gjithë të jeni prezent për të qëndruar të bashkuar në mbështetje të kauzës tonë. Faleminderit!