Kostoja e larta për bazën ushqimore, çmimi i ulët i shitjes së qumështit kanë ndikuar në zvoglimin e fermave familjare. Me kameran tonë pamë nga afër situatën në Zharrëz të Fierit, ku banoret tregojnë se para disa vitesh të gjithë mbanin bagëti e lopë, ndërsa sot numërohen me gishtat e dorës.
Një litër qumësht deleje kushton 100 lekë, ndërsa i lopës 50 lekë. Me këto çmime tejet të ulta, blegtorët e kanë të pamundur të sigurojnë të ardhura për të rimëkëmbur tufat.
Një litër qumësht vlen sa një bidon ujë, thanë blegtorët e Zharrëz, që disa herë kanë protestuar, por s’kanë gjetur zgjidhje, ndaj janë detyruar të ulin numrin e bagëtive.
Për të rimëkëmbur këtë sektor jetik kërkohet gjithëpërfshirje në subvencione si dhe ndryshimin e kritereve nga Ministria e Bujqësisë.
Drejtoria e Bujqësisë në Fier nuk dha informacion statistikor, por tha se ka një tkurrje të numrit të krerëve tek fermat e vogla familjare, ndërsa vihet re një shtim i tyre tek fermat e mëdha dhe subjektet e licensuara për tregtinë e qumështit e mishit.