Kumanovë, 17 gusht – Pas një sëmundjeje, ka ndërruar jetë mjeku specialist Aliriza Osmani – Aushi, figurë e njohur për kontributin e tij gjatë dhe pas luftës së vitit 2001.
Gjatë konfliktit të vitit 2001, Osmani iu bashkua Ushtrisë Çlirimtare Kombëtare në Karadak, së bashku me familjarë, shokë e miq, duke dhënë ndihmesën e tij në përpjekjen për liri.
Pas përfundimit të luftës, ai kontribuoi në institucionet shëndetësore të Kumanovës, fillimisht si drejtor i spitalit dhe më pas si shef reparti. Angazhimi i tij u veçua sidomos gjatë periudhës së pandemisë, kur ishte në vijën e parë të shërbimit ndaj pacientëve.
Ndarja nga jeta e Dr. Aliriza Osmanit përbën një humbje të madhe për familjen, kolegët dhe gjithë komunitetin që e njohu për profesionalizmin dhe përkushtimin e tij.