Presidenti ukrainas Volodymyr Zelensky do të jetë në Paris të enjten, ku do të takohet me Presidenten e Komisionit Evropian Ursula von der Leyen, Sekretarin e Përgjithshëm të NATO-s Mark Rutte dhe udhëheqësit e Gjermanisë, Francës dhe Mbretërisë së Bashkuar, në një takim më të gjerë të aleatëve të Ukrainës.
Fokusi i bisedimeve, siç raportohet nga media franceze , do të jenë garancitë e sigurisë për Ukrainën, një temë që ka dominuar përpjekjet diplomatike perëndimore për t’i dhënë fund pushtimit rus në javët e fundit.
Takimi do të bashkëkryesohet nga Presidenti Francez Emmanuel Macron dhe Kryeministri Britanik Keir Starmer, së bashku me Kancelarin Gjerman Friedrich Merz, i cili do të marrë pjesë nga distanca.
Kievi po kërkon garanci të forta evropiane dhe mundësinë e krijimit të një force paqeruajtëse, duke paralajmëruar se Rusia mund të përpiqet një pushtim të ri edhe pas një marrëveshjeje të mundshme paqeje.
Megjithatë, Moska i hedh poshtë këto iniciativa dhe pretendon se zgjerimi i NATO-s drejt kufijve të saj është një nga shkaqet kryesore të konfliktit.