Shkup, 1 shtator – Kryetari i Alternativës, Zeqirija Ibrahimi, ka uruar nxënësit, prindërit dhe mësuesit me rastin e fillimit të vitit të ri shkollor 2025-2026.
“Urimet më të mira për vitin e ri shkollor 2025-2026! Një urim të veçantë për të gjithë nxënësit dhe sidomos për ata fëmijë që ndjekin klasën e parë. Kjo ditë le të jetë një moment ngazëllues, emocional dhe mbi të gjitha e një rëndësie të madhe”, ka theksuar Ibrahimi.
Ai është ndalur edhe tek roli i mësuesve, duke theksuar se “shkolla duhet të përgatisë personalitetin e fëmijëve mbi vlerat dhe parimet qytetëruese, të edukojë qytetarë të vetëdijshëm dhe njerëz të aftë për t’u përballuar me sfidat e jetës”.
Ibrahimi u është drejtuar edhe nxënësve me mesazhin:
“Çdo vit shkollor duhet të jetë një kontribut i çmuar në formimin e personalitetit tuaj si nxënës, si qytetarë dhe mbi të gjitha si njerëz. Përpiquni të punoni me përkushtim për arritje të suksesshme. Është detyra juaj.”
Ndërkaq, prindërve u ka bërë thirrje për bashkëpunim me mësuesit:
“Bëhuni pjesë e bashkëpunimit dhe komunikimit me mësuesit e fëmijës suaj, me të vetmin qëllim për të arritur synimet që ju keni për ta.”
Në fund, lideri i Alternativës ka uruar:
“Me dëshirën që të gjithë do të kontribuojmë me më shumë përgjegjësi për një arsim sa më cilësor, ju uroj suksese dhe mbarësi për vitin shkollor 2025-2026!”