Prishtinë, 12 dhjetor – Kryeministri i Kosovës, Albin Kurti në intervistën për Kanal10 i është përgjigjur akuzave të BDI-së dhe Ali Ahmetit se ai ka kontribuar në përçarjen e shqiptarëve në Maqedoninë e Veriut. Kurti e mohoi kategorikisht këtë, duke theksuar se roli i tij ka qenë pikërisisht i kundërt.
“Ne i kemi bashkuar ata. VLEN është një bashkim midis subjekteve politike. Qysh i pasmi përçarë ne? Ata ishin disa subjekte të ndryshme, ndërsa ne kishim vetëm një deputet që është anëtar i Vetëvendosjes,” deklaroi Kurti.
Ai shtoi se nëse ka kontribuar qoftë edhe pak në afrim dhe unifikim të subjekteve shqiptare në Maqedoni, kjo duhet parë si vlerë e jo si arsye për akuza.
“Besoj se ky bashkim ka ndikuar pozitivisht. Disa subjekte të shpërndara u bënë bashkë. Kjo është e mirë dhe kjo është arritje e tyre,” tha Kurti.
Deklarata e tij vjen pas kritikave nga BDI, e cila pretendon se ndikimi politik nga Prishtina ka shkaktuar thellim të ndasive mes partive shqiptare në vend.