Preshevë, 22 qershor – Me ftesë të kryetares së Komunës së Preshevës, znj. Ardita Sinani, zëvendëskryeministri i parë i Maqedonisë së Veriut, Izet Mexhiti, dhe kryetari i Komunës së Tetovës, Bilall Kasami, morën pjesë në spektaklin “Shën Tereza, shqiptarja e gjithë botës”, mbajtur në Preshevë.
Ky event solemn mblodhi filantropë, figura publike dhe përfaqësues të institucioneve nga mbarë trojet shqiptare e diaspora, për të nderuar jetën dhe veprën e shenjtë të humanistes shqiptare me famë botërore – Nënë Tereza.
Në këtë ngjarje, Mexhiti theksoi se ky ishte një moment i rëndësishëm për të reflektuar mbi misionin e Nënë Terezës dhe për të promovuar solidaritetin ndërshqiptar.
“Shqiptarët gjithmonë janë gjendur pranë njëri-tjetrit, ashtu siç ka vepruar humanistja jonë e madhe,” u shpreh ai.
Pjesëmarrja e liderëve institucionalë në këtë ngjarje nënvizon rëndësinë që figura e Nënë Terezës ka për mbarë kombin shqiptar – si simbol i dashurisë, përkushtimit dhe humanizmit pa kufi.