Për herë të dytë në vetëm pak ditë, fermerët e Maliqit janë ngritur në protestë duke kërkuar zgjidhje nga organet shtetërore për të gjetur treg për prodhimin e tyre që ngelet stok.
Ata janë mbledhur përsëri në kryqëzimin e Libonikut në afërsi të rrugës nacionale Korçë – Pogradec, aty ku herën e kaluar 24 drejtues mjetesh bujqësore u gjobitën nga 25.000 deri në 100.000 lek të reja për bllokimin e aksit gjatë tubimit.
Produktet e pa shitura dhe çmimi shumë i ulët për mallrat që ata prodhojnë janë dy arsyet kryesore që kanë çuar në organizimin e këtyre protestave. Fermerët kërkojnë marrjen e masave të menjëhershme nga qeveria shqiptare për të bllokuar mallin që importohet nga vendet e rajonit, kryesisht nga Kosova e Serbia.
Sipas tyre, një kilogram grurë kushton 17 deri në 22 lek, apo një kilogram patate 30 lek, dhe kjo bën që fermerët të shkojnë drejt falimentimit.
Ndryshe nga hera e parë, këtë herë numri i fermerëve që kanë dalë në protestë është më i pakët.