Zëvendësministri për Komunitete dhe Kthim, Radoica Radomiroviq është liruar nga kjo pozitë me kërkesë të eprorit të tij ministrit Nenad Rashiq.
Kryeministri Albin Kurti ka nënshkruar vendimin për lirimin e tij nga detyra. Burime të Telegrafit brenda Qeverisë së Kosovës kanë bërë të ditur se njoftimi për lirimin e Radomiroviqit ka ardhur dje në Qeveri.
Ndryshe, Radomiroviq për mediat lokale në gjuhën serbe ka akuzuar Rashiqin për “neglizhencë ndaj serbëve në veri”.
Ai ka thënë se nuk i është treguar arsyeja e vendimit.
Radomiroviq ka shtuar se priste që të shkarkohej më herët pasi kishte biseduar me ministrin Rashiq, kur, siç thotë ai, kishte konstatuar se “nuk ka mirëkuptim për qytetarët e veriut të Kosovës”.
Telegrafi ka provuar të marrë edhe një qëndrim nga ministri për Komunitete dhe Kthim, Nenad Rashiq, por i njëjti deri në publikimin e këtij artikulli nuk ka kthyer përgjigje.
Më 25 maj të vitit 2023 kryeministri i Kosovës, Albin Kurti, e kishte emëruar Radomiroviqin, zëvendësministër për Komunitete dhe Kthim.