Presidenti gjerman Frank-Walter Steinmeier bëri sot thirrje që Evropa të veprojë me më shumë besim si fuqi ekonomike, në ditën e dytë të vizitës së tij në Spanjë.
Steinmeier dhe mbreti Felipe VI hapën së bashku një forum ekonomik gjermano-spanjoll.
“Evropa është një treg me mbi 450 milion njerëz. Kemi një prezencë dhe ndikim të fortë, dhe mund ta përdorim këtë ndikim”, tha Steinmeier.
Ai argumentoi se nëse vendimmarrja në BE bëhet më e shpejtë dhe më e qartë, kjo do të ndihmonte Europën të ushtronte këtë ndikim.
Evropa duhet “të qëndrojë e fortë” dhe të përgjigjet aktivisht ndaj presioneve nga jashtë, si lufta e Rusisë në Ukrainë dhe sfidimi i vlerave bazë nga SHBA-ja, shtoi ai.
Presidenti gjerman Steinmeier do të zhvillojë më pas bisedime me kryeministrin Pedro Sanchez, ku ekonomia dhe lufta në Ukrainë pritet të jenë tema kryesore.
Ai pritet të falënderojë Sánchez për mbështetjen e Spanjës ndaj Ukrainës.
Së fundmi, Spanja ka premtuar 817 milion euro ndihmë të re për vendin ndërsa mbron veten nga pushtimi rus.
Steinmeier gjithashtu planifikon t’i japë futbollistit gjerman, Toni Kroos Urdhrin Federal të Meritës.
Kroos, i cili luajti për shumë vite në Spanjë me Real Madrid, fitoi Kupën e Botës me kombëtaren gjermane në Brazil në 2014. Ai përfundoi karrierën e tij futbollistike vitin e kaluar me një fitore në Ligën e Kampionëve dhe pjesëmarrje në Kampionatin Evropian UEFA.
Megjithatë, Kross, 35-vjeçar, nderohet më pak për sukseset në futboll dhe më shumë për angazhimin e tij social.