Shkup, 19 qershor – Në kuadër të vizitës zyrtare në Republikën e Azerbajxhanit nga 17-19 qershor 2025, Sekretarja e Përgjithshme e Kuvendit, Marina Dimovska, u takua me Sekretarin e Përgjithshëm të kuvendit Kombëtar (Milli Mexhlis) të Azerbajxhanit, Farid Haxhiev.
Sekretarja e Përgjithshme Dimovska shprehu mirënjohje për mikpritjen e Kuvendit Kombëtar të Azerbajxhanit dhe shprehu bindjen se në periudhën e ardhshme bashkëpunimi midis dy parlamenteve, në nivel shërbimesh, do të intensifikohet.
Ajo shtoi se prioritet për Kuvendin e Maqedonisë është përmirësimi i kapaciteteve dhe efikasiteti në punë, prandaj çdo përvojë pozitive, çdo praktikë e re që do të thotë përmirësim i proceseve për ne do të jetë e mirëseardhur. Në këtë drejtim, shtoi Dimovska, mund të shihet bashkëpunimi i përbashkët i ardhshëm midis dy kuvendeve.
Ajo informoi se Parlamenti i Maqedonisë po punon intensivisht në digjitalizimin e proceseve. Njëkohësisht, ajo prezantoi punën e Institutit Parlamentar të Parlamentit tonë, për të cilin Sekretari i Përgjithshëm Haxhiev tregoi interes të veçantë.
Lidhur me digjitalizimin, Haxhiev vuri në dukje se shërbimet e Milli Mexhlisit aktualisht po punojnë në krijimin e një aplikacioni celular për deputetët dhe shërbimin, i cili do të thjeshtojë dhe në të njëjtën kohë do të rrisë efikasitetin e punës.
Të dy bashkëbiseduesit ranë dakord se parlamentet janë institucioni më i rëndësishëm në një vend, ato nuk janë vetëm bartës të procesit legjislativ, por edhe mbikëqyrin zbatimin e tij, prandaj është e rëndësishme të punohet vazhdimisht në përmirësimin e profesionalitetit, efikasitetit dhe njohurive të shërbimit.
