Shkup, 12 qershor – Presidentja Gordana Siljanovska Davkova vazhdon vizitën e saj në Berlin të Republikës Federale të Gjermanisë, ku po merr pjesë në Konferencën për rindërtimin e Ukrainës.
Në konferencë, nikoqir i së cilës është kancelari gjerman Olaf Sholc dhe presidenti ukrainas Volodimir Zelenski marrin pjesë shefat e shteteve dhe qeverive, përfaqësues të organizatave ndërkombëtare, biznesit dhe shoqërisë civile.
Siljanovska Davkova dje iu drejtua panelit kryesor për shefat e shteteve dhe qeverive, në të cilin fjalim mbajtën edhe nikoqirët e konferencës, kancelari gjerman Olaf Sholc dhe presidenti ukrainas Volodimir Zelenski, si dhe kryetarja e Komisionit Evropian, Ursula fon der Lajen.
Në panelin kryesor morën pjesë edhe presidentët dhe kryeministrat e Holandës, Norvegjisë, Finlandës, Lituanisë, Moldavisë, Estonisë, Bosnje e Hercegovinës, Malit të Zi dhe Gjeorgjisë.
Presidentja Siljanovska Davkova në fjalimin e saj tha se pas Luftës së Dytë Botërore, Plani Marshall mes tjerash ishte shprehje e solidaritetit ndaj Evropës së shkatërruar, ndërsa sot siç theksoi ajo, “është i nevojshëm lloj i ri i planit Marshall për Ukrainën e shkatërruar”.
Sipas presidentes, duhet investuar jo vetëm në infrastrukturën rrugore dhe energjetike, por edhe në infrastrukturën njerëzore, arsimore, sociale dhe normative.
Në takim u vlerësua pozitivisht pozicioni ekzistues i përbashkët evropian dhe se duhet të vazhdojë ndihma gjithëpërfshirëse për Ukrainën.
Konferenca është vazhdimësi e serisë së ngjarjeve vjetore të nivelit të lartë kushtuar rimëkëmbjes së shpejtë dhe rinkonstruimit afatgjatë të Ukrainës, pas fillimit të agresionit ushtarak rus. Qëllimi kryesor i ngjarjes është të sigurojë mbështetje të vazhdueshme ndërkombëtare për rindërtimin, rikonstruimin, reformën dhe modernizimin e Ukrainës, kumton Kabineti i presidentes Siljanovska Davkova.