Ambasadori gjerman në Kosovë, Jorn Rohde ka thënë se Gjermania mbështet deklaratën e Shteteve të Bashkuara të Amerikës ku shprehet shqetësimi dhe zhgënjimi pas aksionit të sotëm në katër komunat veriore të vendit.
Rohde përmes një shkrimi në rrjetin social “X”, ka thënë se “njoftimi nuk është konsultim”.
Krejt këtë madje, ai e ka lidhur me masat duke thënë se duan t’i heqin ato, por se kjo situatë duhet të ndryshojë.
“Njoftimi nuk është konsultim. Gjermania i bashkohet Ambasadës Amerikane në shprehjen e shqetësimit dhe zhgënjimit mbi veprimet e pakoordinuara. Kjo duhet të ndryshojë. Ne duam t’i largojmë masat dhe të ecim përpara sa i përket integrimit rajonal dhe evropian të Kosovës. Mos të ketë më gjendje krize të panevojshme.” – ka shkruar ai.