Tajvani po përgatit një buxhet shtesë historik të mbrojtjes prej 1,25 trilionë dollarësh tajvanezë (rreth 40 miliardë dollarë amerikanë) gjatë tetë viteve të ardhshme, i cili, sipas presidentit Lai Ching-te, tregon angazhimin e ishullit për të mbrojtur demokracinë e tij.
“Investimi në mbrojtje është investim në siguri dhe paqe”, tha Lai sot në një konferencë për shtyp.
Lai tha se ndërsa Kina rrit presionin ushtarak, vendet demokratike të Indo-Paqësorit, përfshirë Japoninë, Korenë e Jugut, Filipinet dhe Australinë, po formojnë një konsensus mbi “mbrojtjen dhe përgjegjësinë e përbashkët” të ishulit, duke rritur shpenzimet e mbrojtjes për të kundërshtuar kërcënimet kineze.
Presidenti shtoi se Tajvani synon t’i përdorë fondet e planifikuara për periudhën 2026–2033 për blerje të reja armësh nga Shtetet e Bashkuara dhe për forcimin e kapaciteteve të tij të mbrojtjes asimetrike.
Kina e konsideron ishullin e vetëqeverisur prej dekadash si pjesë të territorit të saj dhe kërkon ta marrë nën kontroll .nëse është e nevojshme, edhe me mjete ushtarake.
Në një opinion të botuar dje në “Washington Post”, Lai shkroi se shpenzimet e mbrojtjes së Tajvanit pritet të rriten në 3,3% të prodhimit të brendshëm bruto (PBB) deri në vitin 2026, me synimin afatgjatë për ta çuar në 5% deri në vitin 2030 – të cilin e përshkroi si investimin më të madh të qëndrueshëm ushtarak në historinë moderne të Tajvanit.
Plani i shpenzimeve ende duhet të miratohet nga parlamenti, i cili aktualisht dominohet nga opozita, veçanërisht nga partia pro Kinës ”Kuomintang”.
Lai e përshkroi buxhetin special si thelbësor, i shtyrë nga kërcënimi kinez./